Pa conmemora Dia Internacional di Mama Tera 2024, y na un manera diferente, Aruba Tourism Authority (A.T.A.) a scoge pa otorga un donacion na organisacion non-profit cu oficialmente tabata estableci na 2020, esta ‘Ban Lanta y Planta.’ Un organisacion cu ta carga e meta pa planta un total di 10.000 mata local pa asina crea, conserva, y restaura un ecosistema caminda cu flora, fauna, y nos hende local por prospera y coexisti den harmonia.

Un donacion cu ta dirigi na un proyecto cu lo yuda na mehora e biomasa di e isla traves di absorbacion y separacion di carbon pa asina enrikece e biodiversidad y rehabilitacion di nos flora y fauna. Ta di menciona cu e organisacion a logra planta un total di 1.000 mata te cu december 2023, y ta continua planta activamente den 2024 hunto cu diferente organisacion y schoolnan local.

E necesidad pa planta mata local, segun strategia, a surgi debi na e caida den cobertura di mata rond di e isla pa motibo di desaroyo, erosion of uzo comercial di tereno. Un topico di suma importancia y valido mirando cu mata ta hunga un rol importante den combati desafionan manera; cambio di clima y perdida di biodiversidad a base di perdida di habitat di nos animalnan. Plantando mata local, e organisacion ta spera di tin un impacto positivo pa asina stop of haci cambio na e decaida di mata rond di nos isla.

A.T.A. ta aprecia e esfuerso, dedicacion, y pa fungi como un organisacion sumamente activo den nos comunidad. Esaki ta inclui provee conseho y atencion na diferente organisacion y esfuerso nacional, incluyendo aki cu enfoke masha importante riba nos hubentud.

Cu e donacion aki, A.T.A. ta spera di por contribui positivamente na e organisacion cu lo yuda na conscientisa, promove, crea campaña, y cumpli cu proyectonan riba e necesidad di conservacion di nos naturalesa.

Bishita https://treesforaruba.com/ pa mas informacion di Ban Lanta y Planta.

Tocante Aruba Tourism Authority (A.T.A.)

Desde prome di januari 2011, Aruba Tourism Authority ta opera como un entidad ‘Sui Generis’. Un organisacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre e socionan local e internacional.

A.T.A. ta pone hopi enfasis riba e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene e esfuersonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.